الي فترة منيحة بدي حتى اكتب شي عنك... اي شي... بس الكلمات نستني وضاعت ببحرك... مافي لغة ممكن انو تعبر عنك.... انت اكبر من اي لغة...بحبك... ومشتاق، بعرف انك تعبانة وضايقة الدنيا عليكي... وآخ لو فيي كون انفاسك الي تريحك ، او عالأقل اقدر خبيكي بقلبي واحميكي برموش عيوني... ما ابعد عنك وما بتركك لحظة، ببساطة انتي إيماني... وما تعودت اتخلى عن مقدساتي
ببساطة أكتر بحبك، وما ممكن ابعد عن شي بحبو..
بحبك عمر كامل ... بحبك ع طول الدهر... بحبك حتى يقولوا الله يرحمو....
انو تخيلي ابعد... شو ممكن لحظتها اعمل بكل تفصيل صغير الك محفور بقلبي وعقلي... وروحي
كل تفصيل فيكي بيسرقني من حالي ومحفور جواتي... انو حتى هديك النظرة الخاطفة عليي بدون قصد... اقرب وأحب لقلبي من كل هدول الي قعدوا يتطلعوا فيني بكل محبة وعن قصد...
بعرف انك تعبانة... وبتعرفي شو يعني حبك وانا اسمي التعب ، بس يمكن نحنا لو بالروح تعاهدنا انو لما بدنا نهرب من بعض... نهرب لبعض شو ماصار..
بتعرفي... عبالي كون هداك الجزء المريح من حياتك المتعبة الي بتقعدي معو بنهاية يومك الصعب والقاسي..
نهارك الي قضيتيه بعيدة ... وخلاني اتأكد انو انا بحبك بغيابك اكتر ما بحبك بحضورك..
بقلك... انا عم اكذب لاني بكل لحظة بحبك اكتر من الي قبلا سواء كنت موجودة ولا لاء... أنا حدا حبك بكل قوة... وبكل ضعف...
بس وجودك بيهمني ... بيشكل فرق بقلبي... بتوازني... باستقامتي..واستقراري ومو بس بيومي
قد مافي حنان بصدر كل أم... انا بحبك
بحبك وبغار عليكي... الغيرة مو شك ولا مرض ، هيي شكل بسيط لدفاع القلب عن ممتلكاتو... وانتي ملك قلبي ... وانا ملكك... وحضنك وطني...
#هامش: بتعرفي شو يعني حضنك وطني...يعني الاستشهاد فيه واجب..
#خربشات
D Ali Eissa
ليست هناك تعليقات:
إرسال تعليق